We blog sometimes !

  • Facebook
  • Twitter
  • YouTube
  • Instagram

කොවිඩ් 19 වසංගතය නිසා විදෙස් රටවල අසරණ වූ ශ්‍රී ලාංකිකයන් 40,000 ක් පමණ ගෙන්වා ගත්තා....



"කොවිඩ්-19 වසංගතයට මුහුණ දී විදෙස් රටවල අසරණ වූ ශ්‍රී ලාංකිකයින් 40,000 පමණ මේ වන විටත් මෙරටට ගෙන්වාගෙන ඇති බව" විදේශ අමාත්‍ය දිනේෂ් ගුණවර්ධන මහතා සඳහන් කරයි.

එක්සත් ජාතීන්ගේ සංක්‍රමණික ජාලය සමඟ ශ්‍රී ලංකාව එක්වීම නිමිත්තෙන් අන්තර්ජාලය හරහා පැවැති රැස්වීමක ප්‍රධාන අමුත්තා ලෙස සහභාගී වෙමින් අමාත්‍යවරයා මේ බව සඳහන් කෙළේය. සංක්‍රමණ පිළිබඳ එක්සත් ජාතීන්ගේ ගෝලීය ජාලයේ ශ්‍රී ලංකා පරිච්ඡේදයේ ආරම්භක දේශනය ආරම්භ කිරීමට ලැබීම මට මහත් ගෞරවයක්. ආරම්භක දේශනය පැවැත්වීමට මට ආරාධනා කිරීම පිළිබඳව ආරම්භයේදීම ශ්‍රී ලංකාවේ එක්සත් ජාතීන්ගේ නේවාසික සම්බන්ධීකාරක හනා සිංගර් සහ සංක්‍රමණික ජාත්‍යන්තර සංවිධානයේ ප්‍රධානී සරත් ඩෑෂ් යන මහත්වරුන්ට කෘතඥ වන බවද අමාත්‍යවරයා සිය කතාව ආරම්භයේදීම සඳහන් කෙළේය. "එක්සත් ජාතීන්ගේ සංක්‍රමණ පිළිබඳ ගෝලීය ජාලය සාමාජික රටවලට ඵලදායී හා, කාලෝචිත සම්බන්ධීකරණයක් ඇති කිරීම සඳහා සංක්‍රමණික ගෝලීය ජාලයක් ස්ථාපිත කීරීම ඉතා වැදගත් වෙනවා. මෙමඟින් සංක්‍රමණ ප්‍රජාවන්ගේ අයිතිවාසිකම් සහ යහපැවැත්මට ප්‍රමුඛතාවය ලැබෙනවා. එමෙන්ම වැදගත්ම දෙය නම්, එක්සත් ජාතීන්ගේ මෙම පොදු ක්‍රමවේදය මඟින් සංක්‍රමණිකයින් මුහුණ දෙන ගැටලු හා ඔවුන්ට එල්ලවන බලපෑම් සම්බන්ධයෙන් මිනිය හැකි යම් ක්‍රමවේදයක් සකසා ගැනීමට හැකියාව ලැබීමයි. 2018 දී ශ්‍රී ලංකාව සහ අනෙකුත් එක්සත් ජාතීන්ගේ සාමාජික රටවල් එක්ව ආරක්ෂිත, විධිමත් හා නිත්‍ය සංක්‍රමණ ගෝලීය සංයුතියක් (GCM) අනුමත කර තිබුණා. ජාත්‍යන්තර සංක්‍රමණය හා සම්බන්ධ සියලු වැදගත් අංග පුළුල් ලෙස ග්‍රහණය කර ගැනීමේ පළමු සාර්ථක උත්සාහය මෙය විය. ශ්‍රී ලංකා රජය සත්‍ය වශයෙන්ම විශ්වාස කරන්නේ මෙම ජාලය දියත් කිරීම, විශේෂයෙන් මේ අවස්ථාවේ දී රටට වටිනා සම්පතක් වනු ඇති බවයි. මෙය ශ්‍රී ලංකා රජයට "ගෝලීය සංක්‍රමණික සංයුතිය" (GCM) ක්‍රියාත්මක කිරීම, වැඩිදියුණු කිරීම සඳහා දරන ප්‍රයත්නයන් සහ දැනට පවත්නා කාර්යයන් ශක්තිමත් කීරිමක් ලෙස අපි විශ්වාස කරනවා. ජාත්‍යන්තර සංක්‍රමණිකයන් ප්‍රමාණය මිලියන 270 ක් පමණ වෙනවා. එය ගෝලීය ජනගහනයෙන් 3.5% ක් පමණ වේ. මෙයින් 60% ක් ශ්‍රම සංක්‍රමණිකයන් වේ. මෙම ශ්‍රම සංක්‍රමණිකයින් නිසාවෙන් ගමනාන්ත රටවල් (COD) සහ ආරම්භක රටවලට (COO) සැලකිය යුතු සමාජ-ආර්ථික දායකත්වයක් ලැබෙන බව පෙන්නුම් කිරීමට සැබවින්ම අතිමහත් සාක්ෂි තිබේ. පසුගිය දශක දෙක තුළ ශ්‍රී ලංකා සංක්‍රමණික සංඛ්‍යාව දස ගුණයකින් වැඩි වී ඇති අතර වර්තමාන ඇස්තමේන්තුවලට අනුව සංක්‍රමණිකයන් මිලියන 1.5 ක් පමණ විදේශයන්හි සේවය කරනු ලබයි. ඒ අතර වාර්ෂිකව පුද්ගලයන් 200,000 ක් පමණ පිටතට පැමිණෙයි. මෙම විදේශීය ශ්‍රී ලාංකිකයන්ගෙන් 800,000 ක් පමණ මැද පෙරදිග කලාපයේ සේවය කරති. 1985 දී විදේශ රැකියා කාර්යාංශය පිහිටුවීමත් සමඟ ශ්‍රී ලංකාව වසර ගණනාවක් තිස්සේ හොඳ විදේශ රැකියා පරිපාලන ක්‍රමයක් සකස් කර ඇති බව ඔප්පු වේ. එලෙස පරිපාලනමය හා නීතිමය රෙගුලාසි, නීති සහ සේවා තිබියදීත්, ශ්‍රී ලංකාව අඛණ්ඩව ක්ෂේත්‍රයේ අභියෝග රැසකට මුහුණ දී සිටී. විදේශ රැකියාවල ආරක්ෂාව, අඩු වේතනය සහ ඉහළ තත්ත්වයක් සහිත රටවලට යොමු වීමට ඇති අඩු ඉඩකඩ හා කාන්තා සේවිකාවන් විසින් ආධිපත්‍යය දරන අඩු නිපුණතා කාණ්ඩවල ශ්‍රම සංක්‍රමණය සංකේන්ද්‍රණය වීම ශ්‍රී ලංකා රජයට විශාල අභියෝගයක් බවද අමාත්‍යවරයා මෙහිදී සඳහන් කෙළේය. දස අවුරුදු සංවර්ධන සැලැස්ම සහ යහපත් වැඩ සඳහා වූ ජාතික ක්‍රියාකාරී සැලැස්ම මඟින් ආර්ථිකය සඳහා ශ්‍රම සංක්‍රමණයේ වැදගත්කම හඳුනාගෙන තිබේ. විදේශීය ශ්‍රම සංක්‍රමණය සඳහා මඟ පෙන්වීම සඳහා වන මූලික උපාය මාර්ගය ලෙස ‘ආරක්ෂිත, පුහුණු සංක්‍රමණය’ සැලැස්ම මඟින් අවධාරණය කරයි. 2007 පෙබරවාරි මාසයේදී විදේශ රැකියා ප්‍රවර්ධනය සඳහා වෙනම අමාත්‍යාංශයක් ඇති කිරීම - විදේශ රැකියා ප්‍රවර්ධනය හා සුභසාධන අමාත්‍යාංශය ශ්‍රී ලංකාවේ ශ්‍රම සංක්‍රමණය සඳහා ලබා දී ඇති ප්‍රමුඛතාවයේ තවත් ඇඟවීමකි. එහෙත්, සංක්‍රමණය සඳහා වන සමාජ පිරිවැය බොහෝ දෙනා විසින් ඉස්මතු කර ඇති නමුත් එමඟින් පවුල් හා ළමයින්ට ඇති කරන බලපෑම අප විසින් අවධාරණය කළ යුතුව ඇත. මේ අනුව විදේශ රැකියා ප්‍රවර්ධනය කිරීම සහ ශ්‍රී ලාංකික සේවකයින් විදේශයන්හි රැකවරණය අතර ඇති සියුම් සමබරතාවය අඛණ්ඩ අභියෝගයකි. ජනාධිපති ගෝඨාභය රාජපක්ෂ මහතාගේ දැක්ම මඟින් මෙහෙයවනු ලබන "රට හදන සෞභාග්‍ය⁣යේ දැක්ම” ශ්‍රී ලංකාව සංක්‍රමණික කම්කරුවන් සහ ඔවුන්ගේ පවුල් ඇතුළු සියලුම ශ්‍රී ලාංකිකයන්ගේ ජීවනෝපායන් සහ සුභසාධනය සහතික කිරීමට කැපවී සිටී. කොවිඩ් වසංගතය ආරම්භ වීමත් සමඟ ශ්‍රී ලංකා සංක්‍රමණික ජනගහනයේ සුභසාධන අවශ්‍යතා සපුරාලීම සඳහා ශ්‍රී ලංකා රජය වහාම පියවර ගෙන තිබේ. මැද පෙරදිග කලාපයේ සංක්‍රමණික කම්කරුවන් 17,861 ක් ද ඇතුළුව ශ්‍රී ලංකාව මේ දක්වා ශ්‍රී ලාංකිකයන් 40,000 කට වැඩි පිරිසක් ආපසු මෙරටට ගෙන්වා තිබේ. මෙම වසර මුලදී වසංගතයේ පළමු රැල්ල අතරතුර, මෙම සේවකයින්ගේ ක්ෂණික අවශ්‍යතා පිළිබඳ ආනුභවික දත්ත එක්රැස් කිරීම සහ මඟ පෙන්වීම සහ තොරතුරු සැපයීම සහ හදිසි අවස්ථා සඳහා සහාය වීම සඳහා ශ්‍රී ලංකාව ‘ශ්‍රී ලංකාව අමතන්න’ වෙබ් ද්වාරය දියත් කළේය. මෙම දත්ත ගබඩාවේ දැනට ශ්‍රී ලාංකිකයින් 98,000 කට වඩා ලියාපදිංචි වී ඇත.ඔවුන් ගෙන් බහුතරය මැද පෙරදිග, ලතින් ඇමරිකා, කොරියාව, ජපානය, හා දකුණු යුරෝපයේ සිටින අයයි. අවදානමට ලක්විය හැකි සංක්‍රමණිකයින්ගේ මූලික අවශ්‍යතා සපුරාලීම සඳහා හදිසි අරමුදල් නිදහස් කිරීම, තෝරාගත් විදේශයන් වෙත වායු සෝපාන, තාවකාලික නවාතැන් හා නවාතැන් පහසුකම් සැපයීම සහ RT-PCR පරීක්ෂණ සදහා අපගේ සමහර දූත මණ්ඩල සඳහා පහසුකම් සැපයීමට ශ්‍රී ලංකා රජය වහාම පියවර ගත්තේය. කොවිඩ්-19 හේතුවෙන් රැකියා අහිමිවූවන්ට රැකියා හෝ විකල්ප රැකියා අවස්ථා පිළිබඳව ජෝර්දානය සහ කටාර් වැනි රටවල් සමඟ සාකච්ඡා කීරිමට හැකි වී තිබේ. මෙම අභියෝගාත්මක කාලවලදී ශ්‍රී ලාංකික සංක්‍රමණිකයින්ට තාවකාලික සහන සැලසීමට දැනටමත් ධනාත්මක පියවර ගෙන ඇති සියලුම රටවලට අපගේ කෘතඥතාව ප්‍රකාශ කිරීමට කැමැත්තෙමි. වර්තමාන ගෝලීය පසුබිම තුළ අපගේ ශ්‍රම සංක්‍රමණිකයින්ට රැකියා අහිමිවීම සහ ඉපැයීම් අඩු කිරීම ඇතුළු අමතර අභියෝගයන්ට මුහුණ දීමට සිදුවේ. තවද, 2019 මුල් භාගයට සාපේක්ෂව 2020 මුල් භාගයේදී ශ්‍රම සංක්‍රමණිකයින්ගේ පිටතට යන ගමන් ප්‍රමාණය 57.2% කින් අඩුවීතිබේ. මීට පෙර වාර්ෂිකව විදේශ රැකියා අපේක්‍ෂා කළ ශ්‍රී ලාංකිකයන් 200,000 ක් හා සසඳන විට මෙය කැපී පෙනේ. කොවිඩ්-19 ලෝක වසංගතයක් ලෙස ලෝක සෞඛ්‍ය සංවිධානය විසින් ප්‍රකාශයට පත් කර ඇති හෙයින්, අප මෙතෙක් නොදන්නා හා පෙර නොවූ විරූ අභියෝගයන්ට මුහුණ දී සිටිමු. කොවිඩ්-19 අර්බුදය ආර්ථිකයන් හා සමාජයන් කෙරෙහි විනාශකාරී බලපෑමක් ඇති කර තිබේ. 2030 තිරසාර සංවර්ධන න්‍යාය පත්‍රය අතරතුර ඊට වසර 10 කට කලින් මතුව ඇති, කොවිඩ් වසංගතයේ බලපෑම දරිද්‍රතාවය තුරන් කිරීම සඳහා ගෙන ඇති බොහෝ වැදගත් ක්‍රියාමාර්ගවල ප්‍රතිලාභ සහ අනෙකුත් තිරසාර අරමුණු සාක්ෂාත් කර ගැනීමට බරපතල බාධාවක් වී තිබේ. ශ්‍රී ලංකාවේ සංක්‍රමණික ජාලය දියත් කිරීමත් සමඟ, මෙම අභියෝගාත්මක කාලවලදී අපගේ සංක්‍රමණික සේවකයින්ට වඩාත් හොඳින් සහාය වීමට සහ ආරක්ෂා කිරීමට ප්‍රායෝගික විසඳුම් සාමූහිකව ගවේෂණය කර සංවර්ධනය කළ හැකිය." ශ්‍රී ලංකා ජනතාව සංක්‍රමණ පිළිබඳ එක්සත් ජාතීන්ගේ ජාලය හා අපගේ දිගුකාලීන විශ්වාසනීය හවුල්කරුවා වන සංක්‍රමණික ජාත්‍යන්තර සංවිධානය සමඟ සමීපව සම්බන්ධ වීමට අපේක්ෂා කරන බවද අමත්‍යවරයා මෙහිදී ප්‍රකාශ කෙළේය

1 view0 comments

HELLORADIO

CONTACT US

077 7 369 324

helloradio.lk

ABOUT US

Hello, Radio is the online radio service of Planet Entertainment, which is catered to the Sri Lankan Sinhala speaking Community living in Sri Lanka and overseas. It is equipped with state of the art systems, software, and unique solutions using Social Media as a tool of communication.

Hello Digital Media Network 2017 © Copyright  2020

MENU

  • Facebook
  • Twitter
  • YouTube
  • Instagram